NET 25

Ang NET25 ay isang istasyon ng telebisyon na libreng nagsasahimpapawid sa ultra high frequency na inilunsad noong 2000 at pag-aari ng Eagle Broadcasting Corporation ng Iglesia ni Cristo (INC). Nagpapalabas ito ng mga programa na nag-uulat ng balita at kasalukuyang pangyayari.Sa sariling website, ipinagmamalaki ng Eagle Broadcasting Corporation na ang NET25 ang may-ari ng “unang trilon tower ng telebisyon sa Pilipinas na 907 talampakan ang taas sa kapatagan sa ibabaw ng dagat, isang makabagong JAMPRO 48-panel antenna at dalawang 60 kW Acrodyne transmitter.”Ito ay sumasahimpapawid sa Metro Manila sa terrestrial TV at sa cable sa buong bansa at sa pamamagitan ng satellite sa Estados Unidos, Europa, Gitnang Silangan at sa Hilagang-Silangan ng Asya.Ang Iglesia ni Cristo ay isang Kristiyanong relihiyon na itinatag ng isang Filipino, si Felix Y. Manalo, sa Maynila at inirehistro sa gobyerno bilang isang simbahan noong Hulyo 27, 1914. Si Theoben Jerdan C. Orosa ang chairman of the board ng Eagle Broadcasting Corporation, na may 20 porsiyentong kaparte sa pagmamay-ari. Si Orosa ay manugang ni Eduardo V. Manalo. Si Manalo ay apo ng tagapagtatag ng Iglesia at ang kasalukuyang executive minister ng INC. Sinasabi ng INC na sila ay nasa higit 100 bansa sa buong daigdig. Sa bansa, mayroon silang 2,251,941 miyembro, ayon sa pinakahuling datos mula sa National Statistics Office.Ang INC ay gumagamit ng impluwensiya sa pulitika sa pamamagitan ng bloc voting o pagboto na parang isang pangkat sa panahon ng pambansa at lokal na eleksyon. Ilang araw bago mag eleksyon, ang mga miyembro ng INC ay binibigyan ng sample ballot na nakalagay ang mga pangalan ng kandidato na ineendorso ng pamunuan ng Simbahan. Ito ay maaaring mangahulugan ng 1.5 hanggang 1.8 milyong boto sa isang pambansang eleksyon kaya't ang simbahan ay napakamakapangyarihan at maimpluwensya.Pero hindi lahat ng mga kandidatong inendorso ng INC sa pagka-pangulo ay nanalo. Noong 1986 snap presidential election, tinalo ni Corazon Aquino ang nakaupong Pangulong Ferdinand Marcos, na sinuportahan ng INC. Noong 1992, si Fidel V. Ramos, na nanalo sa pagka-pangulo, ay hindi inendorso ng INC na sumuporta sa crony ni Marcos na si Eduardo M. Cojuangco Jr..Apat na kandidato sa pagka-pangulo ang inendorso ng INC na kinalaunan ay nanalo. Sila ay sina: Joseph Estrada sa 1998 halalan, Gloria Macapagal-Arroyo sa 2004 halalan, Benigno Aquino III sa 2010 halalan, at ang nakaupong Pangulong Rodrigo Duterte.Pinaniniwalaan ng marami na ang pamunuan ng simbahan ay nagrerekomenda sa Pangulo ng mga miyembro ng INC para sa mga posisyon sa gobyerno, lalung-lalo na sa hudikatura, Commission on Elections commissioner, at Bureau of Customs.